በትግራይ ክልል ከ7 ሺህ በላይ የመንግስት አመራሮችና ሰራተኞች ላይ እርምጃ ተወስዷል

(ኤፍ ቢ ሲ)- በዘንድሮው በጀት ዓመት ለመልካም አስተዳደር ችግሮች መንስኤ በሆኑ ከ7 ሺህ 700 በላይ የመንግስት አመራሮች እና ሰራተኞች ላይ እርምጃ መወሰዱን የትግራይ ክልል ምክትል ርዕሰ መስተዳድር ዶክተር አምባሳደር አዲስዓለም ባሌማ ገለፁ፡፡

ምክትል ርዕሰ መስተዳድሩ የ2009 ዓ.ም የስራ አፈጻፀም ሪፖርትን ዛሬ በተጀመረው የክልሉ ምክር ቤት ጉባኤ ባቀረቡበት ወቅት፥ የተወሰደው እርምጃ ከማስጠንቀቂያ ጀምሮ በህግ እስከ መጠየቅ የደረሰ መሆኑን ተናግረዋል፡፡

ለጉባኤው የቀረበው የክልሉ የስራ አፈጻጸም ሪፖርት እንደሚያሳየው፥ በዚህ ዓመት ባለፉት 15 ዓመታት የተከናወኑ ስራዎችን መሰረት ባደረገው የጥልቅ ተሃድሶ ግምገማ ትኩረት ተሰጥቶት ተሰርቷል፡፡

በግምገማውም በየደረጃው የሚገኙ የመንግስት አመራሮች እና ሰራተኞች እንዲፈተሹ የተደረገ ሲሆን፥ ለ6 ሺህ 467 ማስጠንቀቂያ፣ 1 ሺህ 185 የስራ ሽግሽግ፣ 108 ህጋዊ እርምጃ የተወሰደ ሲሆን ስድስት ያህል ደግሞ ከስራቸው እንዲሰናበቱ መደረጉን ዶክተር አምባሳደር አዲስዓለም ገልጸዋል፡፡

ግምገማውን ቀጣይ በማድረግ የአመራሩ እና የሰራተኛውን የህዝብ ወገንተኝነት ለማሳደግ በትኩረት እንደሚሰራም ነው የገለጹት፡፡

በዚህ ዓመት የወጣቶች የስራ እድል ፈጠራ ትኩረት የተሰጠው ተግባር መሆኑን ያነሱት ምክትል ርዕሰ መስተዳድሩ፥ በክልሉ ከሚገኙ 367 ሺህ ስራ አጥ ወጣቶች መካከል 173 ሺህ ያህሉን ወይም ከ47 በመቶ በላይ የሚሆኑት በተለያዩ ሙያዎች እንዲሰለጥኑ መደረጉን አንስተዋል፡፡

ለስራ አጥ ወጣቶች ለሚሰጠው ብድር ከሚከፈለው ወለድ 7 በመቶውን መንግስት በመሸፈን 8 በመቶ ወለድ ብቻ እንዲከፍሉ የተወሰነ ሲሆን፥ በበጀት ዓመቱም ከ900 ሺህ ብር በላይ ብድር ለ43 ሺህ ወጣቶች መሰጠቱ ተነግሯል፡፡

ብድር የወሰዱትን ወጣቶች ሙሉ በሙሉ ወደ ስራ በማስገባት ሂደት የነበሩ ችግሮችን ለመቅረፍ በቀጣይ ድጋፍ እና ክትትሉ ተጠናክሮ እንደሚቀጥልም ጠቁመዋል፡፡

በበጀት ዓመቱ በገጠር የግብርና ልማት ሰራዊትን በማጠናከር ሙሉ የግብርና ፓኬጅን ተጠቅሞ በክላስተር የሚያለማ አርሶ አደር ለመፍጠር በተደረገው ጥረት፥ የአነስተኛ አርሶ አደሮች ምርታማነት የ15 ነጥብ 5 በመቶ እድገት አሳይቷል፡፡

ይህን በማጠናከር በ2009/2010 የምርት ዘመን ከ28 ሚሊየን ኩንታል በላይ ምርት ለመሰብሰብ ታቅዶ እየተሰራ መሆኑም በጉባኤው ቀርቧል፡፡

በበጀት ዓመቱ 39 ሺህ አዳዲስ ኢንተርፕራይዞች የተቋቋሙ ሲሆን፥ ለማምረቻው ዘርፍ በተደረገው የገበያ ትስስር ወደ ውጪ ከተላኩ እና ከውጪ የሚገቡ ምርቶችን ከሚተኩ የኢንዱስትሪ ውጤቶች የተገኘው ገቢ ወደ 13 ቢሊየን ብር ማደጉም ተገልጿል፡፡

በከተሞች የመኖሪያ ቤት ችግርን ለመቅረፍ በበጀት ዓመቱ ከ14 ሺህ 500 በላይ ነዋሪዎች በማህበር ተደራጅተው የሚሰሩበት 677 ሄክታር መሬትም ተሰጥቷቸዋል፡፡

ዛሬ በቀረበው የክልሉ የስራ አፈጻጸም ሪፖርት ላይ የምክር ቤቱ አባላት በመሰረተ ልማት ዝርጋታ፣ በግብርና ግብዓቶች፣ በብድር አመላለስ እና ሌሎች ጉዳዮች ላይ ላቀረቡት ጥያቄ፥ በነገው እለትም የሚመለከታቸው አካላት ምላሽ ይሰጣሉ ተብሎ ይጠበቃል፡፡

የትግራይ ክልል ምክር ቤት ዛሬ የጀመረውን የክልሉን ምክር ቤት 5ኛ ዘመን 8ኛ መደበኛ ጉባኤ በመጪው አርብ ያጠናቅቃል፡፡

 

Leave A Reply

Your email address will not be published.