ኤርትራዊያን ስደተኞች የሻዕቢያ መንግስት በዜጎቹ ላይ እየፈጸመ ያለውን ግድያና አፈና በመቃወም ሰልፍ ወጡ

(ኢዜአ)- በሰሜን ኢትዮጵያ የስደተኛ መጠለያ ጣቢያዎች የሚገኙ ኤርትራዊያን ስደተኞች የሻዕቢያ መንግስት በዜጎቹ ላይ እየፈጸመ ያለውን ግድያና አፈና እንዲያቆም በመቃወም ሰልፍ ወጡ፡፡

ዛሬ በየመጠለያ ጣቢያዎቹ  ሰልፍ ያካሄዱት ከ30 ሺህ በላይ ኤርትራውያ ስደተኞች በትግራይ ክልል ማይ ዓይኒ፣ ሕጻጽ፣ ዓዲ ሕርሽና ሽመልባ በሚባሉ የስደተኛ መጠልያ ጣቢያዎች የሚገኙ ናቸው።

ስደተኞቹ የሻዕቢያ መንግስት በዜጎች ላይ እየፈጸመ ያለውን አፈናና ግድያ እንዲያቆም ጠይቀዋል።

በተለይ ጥቅምት 21 ቀን 2010 ዓ.ም በ28 እስልምና ሃይማኖት ተከታይ በሆኑ ኤርትራዊያን ላይ የፈጸመውን የግድያ ወንጀል አውግዘዋል።

በክርስትናና በእስልምና ሃይማኖት መካከል ልዩነትና ግጭት ለመፍጠር የሻዕቢያ መንግስት እያደረገ ያለውን እንቅስቃሴን እንዲያቆምም ጠይቀዋል።

ሰልፈኞቹ ካሰሟቸው መፈክሮች መካከል” በግዴታ የሚደረግ ወታደራዊ ስልጠና ይቁም!፣ የተባበሩት መንግስታት በኤርትራ ላይ የጣለውን ማዕቀብ ለአንድ ዓመት ማራዘሙን እንደግፋለን!፣ የአፍሪካ ሕብረት በኤርትራ እየተፈፀመ ያለውን ሰብአዊ ጥሰት በትኩረት እንዲመለከተው እንጠይቃለን!” የሚሉት ይገኙባቸዋል።

ከሰልፈኞቹ መካከል አቶ ሳልሕ ጣሂር ለኢዜአ እንደገለጹት፣ የሻዕቢያ መንግስት እየተከተለ ባለው ፀረ ዴሞክራሲ ስርአት አገራቸውን ለቀው ለስደት መዳረጋቸውን ተናግረዋል።

በኤርትራዊያን ሴቶች ላይ እየተፈፀመ ያለውን በደል የዓለም ማህበረሰብ ትኩረት እንዲሰጠው የጠየቁት ደግሞ የሰልፉ ተሰታፊ ወይዘሮ ፀጋ ተክለሃይማኖት ናቸው፡፡

“የኤርትራ መንግስት በሚከተለው ፀረ ዴሞክራሲያዊ ስርአት የልጆቻችንን ዜግነት ለማወቅ እስከሚያስቸግር ድረስ በስደት ለመኖር ተገደናል” ብለዋል።

Leave A Reply

Your email address will not be published.