ከመተማ ወደ ጎንደር ከተማ ሊገባ የነበረ የጦር መሳሪያ ተያዘ

(ኢዜአ)- ከመተማ ወደ ጎንደር ከተማ በድብቅ በኩል ሊገባ የነበረ 21 ሽጉጦችና ከ15 ሺህ በላይ ጥይት መያዙን በኢትዮጵያ ገቢዎችና ጉምሩክ ባለስልጣን የጎንደር ጉምሩክ መቅረጫ ጣቢያ አስታወቀ፡፡

በጎንደር ጉምሩክ መቅረጫ ጣቢያ የሰራባ ኬላ አስተባባሪ ኮሎኔል ብርሃነ መብራት ለኢዜአ እንደተናገሩት የጦር መሳሪያና ጥይቶቹ የተያዙት ከጭልጋ ከተማ ወጣ ብሎ በሚገኘው ሰራባ በተባለው የመቆጣጠሪያ ኬላ ነው፡፡

የጦር መሳሪያዎቹንና የክላሽ ጥይቶቹን በድብቅ ጭኖ የተገኘው የሰሌዳ ቁጥሩ ኮድ 2-12155 አዲስ አበባ በሆነ ፒካፕ ተሸከርካሪ ሲሆን በመኪናው ውስጥ የነበሩ አራት ተጠርጣሪዎችም በቁጥጥር ስር ውለዋል፡፡

ከትናንት በስቲያ ከፌደራል ፖሊስ ጋር በመተባበር በተደረገው ጥብቅ ቁጥጥርና ፍተሻ የተያዙት የጦር መሳሪያዎችና ጥይቶች በመኪናው አካል ላይ በረቀቀ መንገድ ተበይደው በተዘጋጁ ስውር ቦታዎች ተቀምጠው የተገኙ ናቸው፡፡

“ህገ-ወጥ የጦር መሳሪያ ዝውውር በአካባቢው እየተስፋፋ መጥቷል” ያሉት የኬላው አስተባባሪ፣ በህገ-ወጥ የጦር መሳሪያ ዝውውር የሚሳተፉ ወንጀለኞችን በማጋለጥና ጥቆማ በመስጠት ሕብረተሰቡ የጀመረውን ትብብር አጠናክሮ እንዲቀጥል አሳስበዋል፡፡

ኮሎኔል ብርሃን እንደተናገሩት ከታህሳስ እስከ የካቲት ወር 2010 ዓ.ም ባሉት ሦስት ወራት ብቻ በሰራባ ኬላ 7 ሺህ ጥይቶች፣ 25 ሽጉጦችና ሁለት ክላሽን ኮፕ ጠብመንጃዎች በቁጥጥር ስር መዋላቸውን የዘገበው ኢዜአ ነው፡፡

Leave A Reply

Your email address will not be published.