የአግሮ ፕሮሰሲንግ ኢንዱስትሪ ፓርኮች ከ400ሺ በላይ ለሚሆኑ ዜጎች የሥራ ዕድል ይፈጥራሉ

Walta – በአገሪቱ በአራት ክልሎች የሚቋቋሙት የአግሮ ፕሮሰሲንግ ኢንዱስትሪ ፓርኮች  ከ400ሺ በላይ  ለሚሆኑ ዜጎች   የሥራ ዕድል የሚፈጥሩ መሆናቸውን የኢንዱስትሪ ሚኒስቴር አስታወቀ ።

በሚኒስቴሩ የኮርፖሬት ኮሚኒኬሽን ዳይሬክተር አቶ አሰፋ ተስፋዬ ለዋሚኮ እንደገለጹት የመሠረት ድንጋይ ተቀምጦላቸው የግንባታ ሥራቸውን ለማስጀመር እንቅስቃሴ  እየተካሄደባቸው ያሉት አራት ሞዴል የተቀናጁ  የአግሮ ኢንዱስትሪ  ፓርኮች ዘርፈ ብዙ ጠቀሜታ አላቸው ።

ሞዴል አግሮ ኢንዱስትሪ ፓርኮቹ በአማራ ክልል በቡሬ አካባቢ ፣ በትግራይ በሁመራ ፣ በኦሮሚያ አዳሜ ቱሉና በደቡብ ክልል በይርጋለም አካባቢ  የሚገነቡ መሆኑን የጠቆሙት አቶ አሰፋ ለግንባታ ሥራው  የሚውለውን  1ሺ ሄክታር መሬት  እያንዳንዱ ክልል አቅርቧል ብለዋል ።

በአግሮ ኢንዱስትሪ ፓርኮቹን ውስጥ የሚገቡት 80በመቶ የሚሆኑት የአገር ውስጥ  ባለሃብቶች እንደሚሆኑ የጠቀሱት አቶ  አሰፋ 20 በመቶ  የውጭ አገር ባለሃብቶች  በፓርኮቹ ገብተው እንዲሠሩ ይፈቀዳል ብለዋል ።

መንግሥት አራቱን የአግሮ ኢንዱስትሪ ፓርኮች ለማስገንባት ከዘላቂ ልማት ግብ ፈንድ   የ250 ሚሊዮን የአሜሪካ ዶላር ገንዘብ አግኝቷል ያሉት አቶ አሰፋ ሁሉም ክልሎች ለፓርኮቹ ግንባታ  የሚውል ገንዘብም እንደሚመድቡ አክለው ገልጸዋል ።

የሚገነቡት አግሮ ኢንዱስትሪዎች በውስጣቸው የምግብ ማቀነባባቂያ ኢንዱስሪዎች  ፣ በገጠር  ግብዓት ማቅረቢያና ግብዓት መሰብሰቢያ ማዕከላት ያካተቱ እንደሚሆኑ አቶ አሰፋ አመልክተዋል ።

አግሮ ኢንዱስሪዎቹ በአካበቢያቸው የሚገኙት የግብርና ውጤቶችን በጥሬ እቃነት በመጠቀም  የሚያመርቱ ሲሆን  በፓርኮቹ አካባቢ እስከ 100  ኪሎሜትር የሚደርሱ አርሶ አደሮች  ተጠቃሚ እንደሚሆኑ ተገምቷል ።

መንግሥት የአምራች ዘርፉን ለማሳደግ በተለያዩ የኢንዱስትሪ ዘርፎች የመሠረተ ልማት  የተሟላላቸውን  የኢንዱስትሪ ፓርኮችን  በማስገንባት ላይ እንደሚገኝ  ተዘግቧል ።

Leave A Reply

Your email address will not be published.